검색 양식

Jabuli 32

Tuco bal weko bal, ki yomcwiny ma a iye

1-Dano ma doŋ giweko balle tye kigum,

ma balle doŋ gikwanyo woko.

2Dano ma Rwot pe doŋ kwano bal mo i wiye tye ki yomcwiny,

ma pe tye ki bwola i cwinye.

3I kare ma akwero tuco balla, anoŋo ni koma oballe woko

pi cur ma abedo ka cur dyeceŋ jwi.

4Imiya pwod malit i dyeceŋ ki i dyewor;

tekona ducu otwo woko macalo toyo two woko ki Lyeto me oro.

5Cut atuco balla boti,

pe amuŋo gin marac ducu ma onoŋo atimo;

awaco ni, “Abituco balla ducu bot Rwot”;

ci in bene iweko balla ducu.

6Pi meno wek jo ducu ma gigeni gukel legagi boti;

i kare me can ma noŋo lalele me pii madwoŋ mito mwonyogi woko,

pii meno pe bio i komgi.

7In aye kakannena, igwoka ki i ayela;

igura woko dyere ki larri.

8Abipwonyi dok abicimmi yo ma myero ilubi;

abimiyi ryeko dok abineni.

9Pe ibed calo aguragura nyo kana ma pe niaŋ,

ma myero gitwe doge ki wiye,

wek olub gin ma iwaco.

10Jo maraco gibilimo arem madwoŋ;

ento jo ma gigeno Rwot en gwokogi ki mar mere ma pe lokke.

11Wubed ki yomcwiny madwoŋ i Rwot,

wun jo ma kitwu atir, wudaŋŋe pi yomcwiny,

wun jo ducu ma cwinywu atir!

Baibul 1985

© 1985 The Bible Society of Uganda

More Info | Version Index