검색 양식

Matiu 6

Haꞌausuringaꞌi ꞌIniai Hisu

1Mia Jisas ꞌa oꞌani roꞌu, “Moi waiꞌadoꞌado goro naꞌi ꞌoha moi haaꞌi here goro. Mou gasi haaꞌi beiai haꞌa-taꞌetaꞌe naꞌi maadi noni rago. ꞌOnaa moi haua oꞌasi, mamou bwaꞌi dau heitahari beia Amamoou araꞌai aro. 2ꞌOha ꞌoi hisungiraaui pohara ꞌoi abu haua beiai rongoo raha, ꞌinia naasi here rau haaꞌi sae pwapwaariꞌi suriꞌi rumani haꞌarahesi mei suriꞌi tara raha, ꞌinia rau ꞌirisia do rai haꞌatee haꞌa-taꞌetaꞌeraau. Wai ꞌunua haꞌa-momori tanaꞌamou, naꞌi ꞌoha nara haꞌatee haꞌa-taꞌetaꞌeraau, naasiꞌa i heitahari adaau. 3ꞌOha ꞌoi hisungiraaui sae pohara ꞌoi abui haꞌataꞌinia huraꞌa tanaraaui sae taha naꞌo haa, 4maꞌata ꞌoi haua naꞌi dora bainihu. Taha naꞌo haua naꞌi dora bainihu, ꞌia Amamu araꞌai aro ꞌa ꞌiraraa. ꞌIia naigui tahariꞌo ꞌiniai taha naꞌo haua.”

Haꞌausuringaꞌi ꞌIniai Haꞌarahesi

(Luk 11:2-4)

5“ꞌOha moi haꞌarahesi moi abui ꞌonaairaaui sae nara here ꞌonaa dora odo-odo narau raba ura naꞌi rumani haꞌarahesi manaꞌi tara raha ꞌanai haꞌarahesi dorai reꞌiraau. Wai ꞌunua haꞌa-momori tanaꞌamou, naꞌi ꞌoha nara haꞌatee haꞌa-taꞌetaꞌeraau, naasiꞌa i heitahari adaau. 6Naasi ꞌoha ꞌoi haꞌarahesi ꞌoi siri ahii amua maꞌoi honosiai maraaruma maꞌoigui haꞌarahesi tanaa Amamu naꞌo bwaꞌi reꞌia. ꞌIia na ꞌiraraai taha naꞌo haua naꞌi dora bainihu, ꞌiia naigu tahariꞌo.

7“Manaꞌi ꞌoha moi haꞌarahesi, moi abui ꞌonaairaaui sae ahurodo nara ꞌunu ori-oriꞌi haꞌatee nara aiꞌa rongo haꞌamadomaahu. Ra ꞌadomaꞌinia doni hiꞌona adaau ꞌai aramiꞌi haꞌarahesi adaaꞌi ꞌiniꞌi mwane haꞌatee nara haaꞌi. 8ꞌIꞌamou moi abui ꞌonaairaaui sae oꞌasi. ꞌIa Amamoou ꞌa bwani ꞌiraraai taha mou ꞌirisia mamougu haꞌangoni. 9Naasi ꞌoha moi haꞌarahesi, moi haꞌarahesi oꞌani:

Amameeu naꞌi aro,

na atamu ꞌai maea.

10Na houramu ꞌai boi.

Na heiꞌirisimu rai haua naꞌi anoi bahai

ꞌonaai haua ada naꞌi aro.

11Haua tanaꞌameu i mahoingau ꞌanai dangini.

12ꞌOi ꞌadomaꞌi nugasiꞌameu ꞌiniꞌi ora-oraꞌa ameeꞌi

ꞌonaai ꞌadomaꞌi nugasiꞌi ameeꞌi nei ra haaꞌi ꞌino bwarasiꞌameu.

13Maꞌoi ꞌaꞌauhiꞌameu ꞌanai ura bwarasiꞌi heiohongi

maꞌoi taatahi bwarasiꞌameu baania Saetan.

14“ꞌOnaa moi ꞌadomaꞌi nugasiꞌi ora-oraꞌa adaaꞌi nei ra haaꞌi here ra aiꞌa goro tanaꞌamou, ꞌia Amamoou araꞌai aro ꞌai ꞌadomaꞌi nugasiꞌi ora-oraꞌa amooꞌi roꞌu. 15Ma ꞌonaa mou bwaꞌi, ꞌia Amamoou ꞌa bwaꞌi ꞌadomaꞌi nugasiꞌi roꞌu i ora-oraꞌa amooꞌi.”

Haꞌausuringaꞌi ꞌIniai Haꞌariri

16“ꞌOha moi haꞌariritaꞌi ngau, moi abui ꞌome ahutotou beia ꞌonaai haua adaaui sae ra here ꞌonaa dora odo-odo. Rau ꞌome haꞌataꞌataꞌahi beia do nei narai reꞌiraau. Wai ꞌunua haꞌa-momori tanaꞌamou, naꞌi ꞌoha nara haꞌatee haꞌa-taꞌetaꞌeraau, naasiꞌa i heitahari adaau. 17Naasi ꞌoha ꞌoi haꞌariri, ꞌoi aromaa maꞌoi ꞌahaꞌaha goro 18neina bwaꞌi sae nai ꞌome ꞌiraraa doꞌo haꞌariri. Maꞌata ꞌia Amamu na ꞌiraraai taha naꞌo haua naꞌi dora bainihu, ꞌiia naigui tahariꞌo.”

Haꞌausuringaꞌi ꞌIniai Totoꞌora Naꞌi Aro

19“Moi abui boriboriꞌi totoꞌora ꞌanai marewanani, ꞌinia heꞌa mana ꞌadi ra mataꞌi haꞌataꞌaiꞌi, mana sae beriberi ra matai siri naꞌi ruma ꞌanai beriꞌi. 20Maꞌata moi haaꞌi mwani mareho goro neina ꞌa ꞌonaa domou nugaꞌi totoꞌora amooꞌi naꞌi aro, dora i heꞌa mana ꞌadi ra bwaꞌi matai haꞌataꞌaiꞌi naꞌiei mana sae beriberi ra bwaꞌi matai beriꞌi. 21Moi haua oꞌasi, ꞌinia na ꞌadomaꞌimu ꞌai awa tarau naꞌi dora na totoꞌora amuꞌi ra awa naꞌiei.”

Haꞌausuringaꞌi ꞌIniraaui Nei Nara Naga ꞌIniꞌi Mwani Maho

(Luk 11:34-36)

22“I maa ꞌa ꞌonaai raita anai abemu. Naꞌi ꞌoha na maamuꞌi ra goro hako, na abemu ꞌa honuraꞌi marewa. 23Ma ꞌonaa na maamuꞌi ra taꞌaꞌi, na abemu hako ꞌa honuraꞌi kuhi. ꞌOnaa ꞌo ꞌadomaꞌinia do ꞌo awa naꞌi marewa maꞌogu awa naꞌi kuhi, iꞌoe ꞌo huunai awa naꞌi kuhi.”

Haꞌausuringaꞌi ꞌIniai Haꞌa

(Luk 16:13; 12:22-31)

24“ꞌA bwaꞌi sae nai tauꞌaro goro tanaai rua bwauodo. ꞌOnaa nai oꞌasi, me ꞌiia ꞌai ꞌitaa ta nei mai taꞌahiai nata nei. Maꞌua ꞌai ꞌadomaꞌi haꞌahoua tanei mana nata nei ꞌa bwaꞌi. Naasi ꞌa bwara ꞌanai tauꞌaro tanaa God ma doꞌoigui taꞌahia roꞌu i haꞌa.

25“Naasi, wai ꞌunua tanaꞌamou, ꞌai abui taꞌaabemu ꞌiniai tahingamu ꞌado dangi, ꞌiniai taha ꞌanai ngaua mana gono mana bwana naꞌoi hoꞌosia. ꞌInia na tahingamu, aiꞌa moi ꞌanai ngaaꞌi mahoingau, mana abemu aiꞌa moi ꞌanai hoꞌosiai bwana. 26Moisui ꞌomesiraaui manu naꞌi ahoasara, rau aiꞌa hasi mahoingau mana ꞌeꞌeri maꞌua nuga tagumaꞌiniꞌi mahoingau naꞌi hare. Mia Amamoou araꞌai aro ꞌa hanganiraaui manu ꞌisi. Miꞌamou tanaa God, mou ororiu diꞌu baaniꞌi manu ꞌisi. 27Ma reiꞌuaa na towaꞌi taꞌaabemoou, me mareho nara taꞌaabemoou ꞌiniꞌisi, ra bwaꞌi ꞌaꞌauhiꞌamou ꞌanai haꞌatewaa ꞌari tahi namou haa naꞌi marewana.

28“ꞌA ꞌua na taꞌaabemoou ꞌiniai bwana ꞌanai abemooꞌi? Moisu ꞌadomaꞌi suriꞌi tagai raraaua ni hasimou. Rau aiꞌa haua ta tauꞌaro maꞌua tata nadaau bwana. 29Mawai ꞌunua tanaꞌamou, reiꞌuaa ꞌia Mwaeraha Solomon ꞌa totoꞌora, maꞌata aiꞌa ta taꞌi bwana ana nai ꞌome goro taꞌisada beia ta taꞌi tagai raraaua. 30Hinihinimoou ꞌa kekerei diꞌu! ꞌOnaa ꞌia God na haꞌa-ꞌomegoroꞌi tagai raraaua nara ahurara moi gere madoraa maraigui suungiꞌi, ni ꞌua ana na bwaꞌi haaꞌi bwana ꞌinia tanaꞌamou?

31“Naasi, moi abui oꞌani, ‘ꞌE taha gaigui ngaua, maꞌua ꞌe taha gaigu gonohia, maꞌua hoꞌosia?’ 32Naꞌisi mareho na ꞌiraaui sae narau aiꞌa aidangisia God rau ꞌadomaꞌi raha ꞌiniꞌi. Naasi ꞌai abui taꞌaabemoou, ꞌinia ꞌia Amamoou araꞌai aro ꞌa ꞌiraraa domou ꞌirisiꞌi mareho ꞌisi. 33Maho na ororiu diꞌu domoi haua, naasi ꞌanai awa tarau naꞌi bahainai heimarungi ana God mana awa suriai heiꞌirisina. ꞌOnaa moi haua oꞌasi, mia God ꞌai haua tanaꞌamoui mwani mareho ꞌisi. 34Naasi ꞌai abui taꞌaabemu ꞌiniai hoꞌoa. Dangini ꞌa toꞌoraai mareho ꞌana haaria ꞌanai taꞌaabemu ꞌinia.”

Taroha Goro Mana Usuusu Maea

© Wycliffe Bible Translators, Inc. All rights reserved.

More Info | Version Index