검색 양식

Aposol 28

Paulu Iyepe Motmot Malta

1Am le imot amwe di amsolo tana dook mata. Motong la amlongo betanga ben motmot tani in ene la Malta i. 2Inbe di tooltool ke motmot tani ngan tiyei dada dook mata pam. Le nga tipata ei, inbe tiwete pam am le imot be la ei tani in iloo am, yesoo ki mol le ni isil san. 3Le nga amla, motong la Paulu la inokrai kai a man itar lo ei pono. Ngan moto dook tiap atu yo iyepe kai tina ngan lono i, in iyetaia ei yesene, le nga ipas ke ei lono a isi pang diki le si ikana Paulu baene a ikara ye dongana le imede sila itungu ye. 4Ye kene tani in di tooltool ke motmot in tikamata moto tani yo ikana Paulu baene a sila itungu ye nga, le nga di tapdi tiwetewete nen. Tiyei ne, “Ona, tool i o tool ke raumatenge di tooltool, yesoo kasin le be ilene tiek lono a imata, ngan le tiap. Bong yo nookoot nga maro yo ke yemenaingi di tooltool i, in o ke be imalum panga a iyepe maurene mulu tiap.” 5Bong ngan Paulu itirkede moto tani in le idu ei lono, inbe so sa pombe pang ye tiap. 6Motong la di tooltool tina ngan titar matadi a tiyeisa ole tinin sarer, too ole palbe leu be imol du tana a imata. Bong ngan di tooltool tina ngan tinam tinam le tiap, inbe tikamata so sa yo pombe pang ye Paulu, ngan tiap. Motong la tipalele lodi mulu, inbe tiwete nen. Tiyei ne, “Tiap, i o maro atu naii.”

7Ngan ni tani yo amsolo ye i, in potai pang ye tana ke tool kuto mai yo ene Pulias i. Ya in iyei kuto mai pang motmot tani in. Le nga tool tani in ikiu am la amyepe ye rumu ki a ipakanam, inbe matan kalam dook mata ye ke tol. 8Ye kene in amye Pulias tani amyepe, inbe matamatenge mai ikaua tamana le nga ikenen kookoowoo pono ki ke kenongo. Ngan matamatenge tani yo ikauu i, in tinin yes ye, inbe imin tene ngan ran ran leu. Le nga Paulu ipa a ilo be lo ikamata, motong la ipaloko baene lo pono, inbe ipatarau ye, ngan le tinini dook mata mulu. 9Ngan yeisa be tikamata Paulu tani yo iyei nen nga, motong la di tooltool ke motmot tani ngan kapala yo matamatenge ikap di nga, ngan timan pang ye Paulu man ikarata di le tinidi dook mata mulu. 10Ngan di tooltool tina ngan tiyei dada dook mata matana matana pam, le nga ye kene yo amkaratam be amkooi mulu ye in nga, ngan le tikap so tina le imot yo ammaka ye nga, ngan pam be ilonam ye kooingi kiam tani in.

Paulu Ila Pombe Rom

11Amyepe ye motmot tani yo Malta i, in ye taudu tol a imot, motong la amyiri ye ookoo san mulu yo itattadaia eng a idaudau ye motmot tani in a be amkooi mulu. Ngan ookoo tani in ke malala mai Aleksandia, inbe tisap tomonai maro kidi tamoto ru yo bokoboko nga, ngan kanningadi ilo ye ookoo tani in damono.+ 12Motong la amkooi ye ookoo tani in a amla nga, ngan le la pombe ye malala mai Sirakus, le nga la amyepe ye ke tol nango. 13Motong la amkooi mulu a amyege Sirakus, ngan le la pombe ye malala mai Rekium. Le nga la amyepe a bongbongini ki, motong la be amkooi mulu ngan karaka ipa lapau, le nga amkooi ye ke ru, motong la amla pombe ye malala mai Putioli nga. 14Le nga amkooi di amsolo, ngan amkamata di diemam kapala yo titara lodi medana pang Yesu nga. Motong la titoram be sila amye di amyepe kasin ye ke limi be ru ngan. Ngan nen le amye di amyepe a imot, motong la amyege di sila tiyepe, inbe ampa a amla pang malala mai Rom. 15Ngan ye kene tani yo be amla ye in nga, ngan di diemam kapala yo titara lodi medana pang Yesu a tiyepe Rom nga, ngan tilongo betanga ben am la ampa dada a be amla nga. Motong la tipakalam a timan, ngan le di kapala tipa le man titauarai am ye ni ke gaongo yo ke Apius i, inbe di kapala ngan tipa so le man titauarai am ye ni yo tiwete ene ye Rumu Tol Kidi Lowo i. Ngan yeisa be Paulu ikamata di diemam tina yo timan nga, ngan le lono dook mata, inbe iwete lo ponana ki pang Maro. 16Ye kene tani in ampa le la pombe Rom, motong la tool kuto mai ke Rom imalum pang Paulu be ya taunu iyepe kandor ye rumu atu, inbe tool ke patokongo atu ole yaru tiyepe a matan kala.

Paulu Iwetewete Pang Di Tooltool Ke Rom Ye Bingi Dook Mata

17Amla amyepe, le nga ke tol iman a ila, motong Paulu tani in ikiu di tooltool kuto maimai yo kidi Yuda nga, ngan be man tigaua. Le nga man tigaua, motong la Paulu iwete pang di nen, “Ang di diek nga, ngan au i ayei touo so sa dook tiap pang di tooltool kiidi, too be awil momo yo kidi sasa kiidi nga, ngan tiap. Bong tina nanga la tikau au Yerusalem a tiparamau, inbe titarau la di tooltool kuto maimai ke Rom baedi nga. 18Ngan di kuto maimai tina ngan tilongo betanga kiau a titor paninau, ngan tipuske touo dada dook tiap sa yo ayeii ke be tiraumatau ye a amata, ngan tiap. Le nga lodi be ole timalum pau a ala. 19Bong ngan kene tani in di Yuda lodi pang betanga kidi tiap. Le nga dada kiau sa mulu siap, bong awete be nen ngan Sisa la be ilongo betanga kiau i. Bong o ke be ayeie betanga sa pang di diek Yuda, a nen ngan agarung di ye ni ke karatanga betanga, ngan tiap. 20Ngan ye punu in la le akiu ang be kaman a man akamatang, a nen ngan man awete betanga i pang nga. Au i atar matak, inbe anam ye soo so yo idi Isrel le imot be tanamu i, ngan ye punu in la le nookoot nga tipau au ye ooroo medana ye i.”

21Motong la tiwete pang Paulu tani nen, “Am nga, di tooltool ke Yudia sa tiwodo rau pam pot be pot iso talngamam yong, ngan tiap. Inbe tooltool sa ipa ke nin a ipot be pot igasa pam, too iwete betanga dook tiap sa yong, ngan tiap lapau. 22Bong am nga lomam be ong taum kuwete lom a amlongo, yesoo lomam galanga nen di tooltool ke ni mai i le imot nga, ngan tiwete betanga dook tiap pang ang tooltool yo kayegam a la kayeie budanga san nga.”

23Tiwete nen a imot, motong la tiye Paulu tikarata betanga be ole tigaua ye lal atu. Motong la ye ke tani ngan di tooltool alunu le alunu kaiye la man tigaua ye rumu tani yo Paulu iyepe ye i. Le nga ye ke mooloo tani in muntu le du rrai nga, ngan Paulu iwetewete pang di a iwete nini dada yo Maro be matan kala di tooltool ki ye i, in pang di. Inbe ikapye be ipapos betanga kapala ke ger ke Maro yo iwete pang Mose a iwodo nga, inbe ye rau kidi Maro koonoo, ngan pang di lapau. Ngan be iwete pang di nen a be ipamadit lodi, a nen ngan titara lodi medana pang Yesu. 24Ngan Paulu iwete nen, le nga betanga ki iso di tooltool tina ngan kapala lodi, bong di kapala ngan titara lodi medana ye betanga ki tiap. 25Motong la di tooltool tina ngan di tapdi tiwetewete a tiparsu ye betanga, le nga timadit a be tiyege Paulu a tila. Bong ye kene yo be tila ye in nga, ngan Paulu iwete betanga atu mulu pang di nen. Iyei ne, “Ai, Maro Amunu Silene ipasongosongo Maro koonoo yo Esai i, in be la iwete betanga moolmool pang di sasa kiidi nen,

26‘Ole kula pang ye di tooltool ngo la kuwete pang di nen,

“Kanakana ngan ole kalongo betanga yo Maro iwete nga, bong o ke be lomim galanga ye tiap.

Inbe kanakana ngan ole kakamata so yo Maro iyei nga, bong o ke be kakilala tiap.”

27Yesoo, di tooltool tina ngan lodi parkat le betanga ke Maro ilo lodi tiap,

inbe tidikidiki talngadi le ke be tilongo betanga ye tiap,

inbe matadi kilikili le ke be tikamata ni ye tiap.

Ngan yo be tiyei nen tiap nga,

ngan matin le tikamata so ye matadi, inbe tilongo betanga ye talngadi, inbe lodi galanga ye,

a be nen ngan tiportak lodi a timulu pang yau man akarata di le dook mata.’+  ”

28-29Paulu iwete pang di tooltool tina ngan nen, motong la iyei ne, “Ngan nen le au i lok be ang nga lomim galanga nen, betanga ke Maro yo be Yesu ikau idi a ipamulidi ye so dook tiap yo be igarungidi i, in la nookoot nga ikauu pang di tooltool yo tipa ye rara kidi Yuda tiap nga. Ngan di la be tilonga nga.”+

30Paulu tani iwete pang di nen, motong la sila iyepe ye rai kerana ru ye rumu tani. Inbe ikap pat pang rumu taunu tani a be iyepe ye. Inbe di tooltool yo be timan pang ye be man tikamata nga, ngan lon ponana ye di a ikap di le imot a tilo rumu ki. 31Inbe ipatomonai di ye betanga ke Tool Mai Yesu Kirisi, inbe iwetewete pang di ye dada yo Maro be matan kala di tooltool ki ye i. Ngan le Paulu tani in ke be itattadai tiap, inbe tool sa ke be ilele ye betebetanga, ngan tiap lapau.

Rau Ke Maro

© Wycliffe Bible Translators, Inc. All rights reserved

More Info | Version Index