검색 양식

Aposol 5

Annias Iye Rimana Sipodo Tillungu Maro

1Ye kene tani in, tool atu yo ene Annias i, in iye rimana Sipodo tiyepe lapau. Ngan yaru tiyawar tana kidi pattu a tikap pat ye. 2Motong la Annias ipoto pat tina ngan kapala a iken panga ya taunu, inbe ikap kapala la illung di aposol ke Yesu ben pat tina le imot la ikap la ikap pang di koot nga. Ngan rimana in lon galanga ye dada yo nintooroo iyeii i, in oo.

3Motong la Pita iwete panga nen, “Atoo, Annias nga yelei a Satan idiwidiwong a be kullungu Maro Amunu Silene nga? Ong in kutarkoo pat kapala yo kop ye tana kiong nga, too? 4Ngan tana in kiong, le ong taum lom le matam be kuyawari a kop pat ye. Le pat yo kop nga, ngan pat kiong ong taum ke be kuyei urata kiong ye lapau. Bong nga soo so iyeie ong a le lom kaua urata ye dada dook tiap i nga? Ngan kin lom tar be nga kullung di tooltool leu be. Tiap, nga kopke be kullungu Maro lapau.”

5Ngan Annias ilongo betanga yo Pita iwete nga, le tina imol du tana a imata. Ngan nen le di tooltool yo tilongo betanga, inbe tikamata so yo pombe pang ye Annias nga, ngan le titattadai welewele. 6Motong la di tamoto koskos pattu timan tiduku bobono ye wam, inbe tikauu du tana a tisola la tikelmaii.

7Ngan ye kene tani in tiyepe le mooloo mata tiap, inbe Annias rimana yo Sipodo i, in ise. Ngan lon galanga ye so yo pombe pang ye nintooroo i, in tiap. 8Motong la Pita itoru nen, “Ai, kuwete pau. Pat tina yo kuye Annias kakap ye tana kiang nga, ngan nanga leu, too?”

Ngan Sipodo tani in iyei ne, “E, pat tina nangan leu.”

9Motong la Pita iwete panga nen, “Nga yelei a kuye nintooroo karaua betanga a kakapye be kallungu Tool Mai Amunu nga? Kulongo, di tooltool yo tisolo nimtooroo la tikelmaii nga, ngan di nangan la tipa a tise pang dada ngan. Ole tisolong lapau a kadu.”

10Pita iwete nen, le tina pattu leu inbe Sipodo tani in imol a idu Pita kene punu, le imata yege. Motong la di tamoto koskos tina ngan tise rumu lono, ngan tikamata yo imata koot nga. Le nga tikauu du tana, motong la tisola lapau a tila la tikelmaii potai pang ye nintooroo tani in gigini. 11Ngan nen le di tooltool yo tigaua ye bareme ke Yesu nga, inbe di tooltool kapala yo tilongo bingi ke so tina yo pombe nga, ngan di le imot titattadai welewele.

Mos Matana Matana Pompombe

12Di aposol tina, ngan tiyei gogo mos matana matana kataunu ye di tooltool, a iyei ben tarkilanga pang di. Inbe di tooltool le imot yo titara lodi medana pang Yesu nga, ngan kanakana ngan tilo koongoo lono ke bareme mai ke sungunu, lo tigaua ye ni yo tiwete ene ye Kookoowoo ke Solomon i. 13Ngan di tooltool kapala yo titara lodi medana tiap nga, ngan tiyitmak di tooltool yo titara lodi medana pang Yesu, ngan edi. Bong di ngan titattadai, le lodi be man tiye di tigaua tiap. 14Di ngan lodi nen, bong kanakana ngan di tamoto le di garup alunu le alunu san la titara lodi medana pang Tool Mai nga, le tiseke kinkatingi kidi tooltool yo titara lodi medana panga muku nga, ngan pang ete. 15Ngan tina di tooltool ngan tikamata mos yo di aposol tiyei nga, le nga tisolo di tooltool yo matamatenge ikap di nga, ngan a tidu ke diki du tipataken di lo mie le kookoowoo pono kidi, a tiken dada gigini. Ngan tiyei nen a be nen ngan Pita be itoo dada tani in a ise le ke iso kanningana le iloko lo di tooltool tina ngan podi nga, ngan ole tinidi dook mata mulu. 16Inbe di tooltool yo tiyepe ye malala maimai potai pang ye Yerusalem nga, ngan tikap di tooltool yo matamatenge ikap di nga, inbe di tooltool yo so sadi igarung di nga, ngan a timan pang ye di aposol tina man tikarata di le imot.

Bangabangana Ke Maro Ilon Di Aposol Ke Yesu

17Ngan tool kuto mai ke paroranga so pang Maro i, in iye di diene kapala yo tiwete di ye Sedusi nga, ngan tikamata so tina yo di aposol ke Yesu tiyei nga, le nga lodi dook tiap pang di ye. 18Motong la tiparama di aposol ke Yesu tina, inbe titar di lo rumu dook tiap kidi talnga dikidiki lono. 19Le nga tiyepe a bong, motong la bangabangana atu ke Maro isi si iso dada ke rumu dook tiap tani, inbe ipadu di aposol tina a tidu tana. 20Motong la iwete pang di nen, “Kalo lo kakodo koongoo lono ke bareme mai ke sungunu ni, inbe kawetewete pang di tooltool ye dada yo be tikaua yepongo paunu ye i.”

21Di aposol tina, ngan tilongo betanga nen, le nga muntu yege inbe tilo bareme mai ke sungunu lono lo timadit ye patomonaingi di tooltool.

Ye kene tani in tool kuto mai ke paroranga so pang Maro, in iye di diene man pombe, motong la tikiu di tooltool kuto maimai kidi Yuda yo matadi kala momo le yepongo kidi nga, ngan tise a se tigaua. Motong la tiwanga di bianga be du tikap di aposol ke Yesu tina a tise. 22Le nga di bianga tina ngan tidu be du tikap di a tise, bong tidu pombe ngan tikamata di tiap. Motong la timulu a lo tiwete pang di kuto maimai tina ngan nen, 23“Ai, dada ke rumu dook tiap ni titiukala, inbe tipamede le imede san. Inbe di tooltool yo tikodo a matadi kala dada nga, ngan amdu ngan tikododo. Bong kene yo be amso dada ye in nga, ngan amkamata touo tooltool siap.” 24Ngan tool kuto mai yo matan kala di bianga yo tikodo kala bareme mai ke sungunu i, in iye di tooltool maimai ke paroranga so pang Maro tilongo betanga nen, le nga lodi gurrungu ye, inbe tiyei ne, “Ona tiap! Di tooltool nga tilledi belei na?”

25Motong la tool atu se iwete pang di kuto maimai tina nen, “Kakamata! Di tooltool tina yo katar di lo rumu dook tiap kidi talnga dikidiki lono nga, ngan di nango lo tikododo koongoo lono ke bareme mai ke sungunu a tipatomonai di tooltool ngo.” 26Motong la tool kuto mai tani yo matan kala di bianga i, in iye di bianga tilo alo tikap di aposol tina ngan dook mata a tisi. Bong tiyeie so sa pang di tiap, yesoo titattadai di tooltool be ole tikatmatamata di ye pat nga.

27Le nga di bianga tikap di aposol tina a tilo le lo tipatokodo di dama kidi tooltool kuto maimai kidi Yuda yo matadi kala momo le yepongo kidi nga. Motong la tool kuto mai ke paroranga so pang Maro in itor di nen, 28“Ai! Kalongo, ang nga amwete betanga pam, inbe amkodokalang be kin kapatomonai di tooltool mulu ye tool tani in ene be. Bong ngan tiap, kasak koomam, inbe kasudungu patomonaingi di tooltool. Le di tooltool le imot yo tiyepe Yerusalem nga, ngan tilongo betanga kiang oo. Inbe kasuku betanga pam a kawete be am la amraumata tool tani in a imata nga.”

29Motong la Pita iye di diene aposol tiraua betanga ke tool kuto mai tani in nen, “Am nga be amtoo betanga ke Maro leu, bong be amtoo betanga ke di tooltool tiap. 30Ngan Yesu yo kapatota lo kai palasingi kaini a imata i, in Maro kidi sasa kiidi la ipamaditi a imadit mulu ye ni ke matenge i. 31Le Maro ikauu a ilo le lo itaru a iwur ye baene oonoo, inbe iyei tool mai be matan kalidi tooltool nga le imot, inbe iyei tool yo be ipamulidi ye so dook tiap yo be igarungidi i. Ngan Maro iyei nen, a be nen ngan idi tooltool ke Isrel taportak lodo ye dada dook tiap kiidi yo tayei nga, ngan ole igiri noonoo kiidi. 32Ngan nanga, so tina yo Maro iyei a amkamata nga, ngan la amwetewete pang di tooltool ye nga. Inbe Maro Amunu Silene la iwetewete ye so tina ngan lapau i. Ngan Maro ikaua Amunu Silene tani in pang di tooltool yo tilongo betanga ki a titoo, ngan oo.”

33Di kuto maimai tina ngan tilongo Pita yo iwete nen nga, le tina katedi malmal le dook tiap yege, inbe lodi be le tiraumatamata di aposol tina a timmata. 34Bong ngan di Paresi tina ngan atu yo ene Gamaliel i, in iyepe lapau. Ya in pannoongoo ke ger ke Maro, inbe di tooltool le imot tipayiti ye urata ki lapau. Ngan Gamaliel tani, in imadit le lo ikodo kataunu kidi tooltool kuto maimai tina, inbe iwete be tikap di aposol tina ngan a tidu tana du tinam kasin ngan. 35Ngan tikap di a tidu tana, motong la Gamaliel tani in iwete pang di kuto maimai kapala nen, “Ai, ang tooltool ke Isrel nga, ngan lomim be kayeie so sa pang di tooltool ngo nga, ngan dook mata, bong ole lomim kaua urata dook ngan. 36Ngan lomim galanga ye tool yo ene Tiodas i. Ye rai kapala yo ila koot nga, ngan Tiodas tani in imadit tina le iwete be ya in tool mai inbe ene mai lapau. Ngan nen le di tooltool yo titoo nga, ngan kinkatingi kidi ben 400. Bong yeisa be di tooltool tiraumata Tiodas a imata, ngan le di tooltool tina yo titoo nga, ngan timagirigiri le urata ki tani yo ipamaditi i, in ikino. 37Le mooloo tiap, inbe ye lal yo ke be tiwodo di tooltool edi lo ye rau mai i, in pombe, ngan tool ke Galili atu yo ene Yuta i, in koon paweserai di tooltool kapala be titoo a iye di tiraua tool kuto mai yo iyei mata koro in a ikoo. Bong yeisa be tiraumata Yuta tani in, ngan le di tooltool ki yo titoo nga, ngan timagirigiri a tikoo lapau. 38Ngan nanga, nookoot nga be awete pang nen, kin kayeie so sa pang di tooltool ngo be. Bong kawulai baemim ye di a tila, inbe takamata di. Kumata be dada le urata kidi yo tiyei ngo, ngan be pombe ye di tapdi lodi leu nga, ngan ole urata kidi taukan kanono. 39Bong kumata be Maro ya taunu la ikap urata ngo pang be tiyei nga, ngan o ke be kalele di tiap. Be nen ngan ole kakamata ben nga kakapye be kaye Maro kapatoko.”

Ngan betanga ke Gamaliel tina ngan iso di kuto maimai lodi, 40le nga tikiu di aposol tina a tise. Motong la tiwete pang di bianga a tisalit di ye koro leu. Inbe tiwete tootoo pang di be kin tiwetewete betanga nen mulu pang di tooltool ye Yesu ene be, inbe tiwulai di a tila.

41Le nga di aposol tiyege di kuto maimai tina a tidu tana, ngan le lodi ponana kaiye, yesoo Maro ikamata di ngan ipayit di ben di la ke be tisolo moonoo, inbe moomoodi ye Yesu ene nga. 42Ngan nen le ye ke kanakana nga, ngan di aposol tina timaryoo tiap, bong tilo koongoo lono ke bareme mai ke sungunu, inbe tila ye rumu kidi tooltool atu atu a la tipatomonai di tooltool ye bingi dook mata ke Yesu, ben ya in Kirisi, tool tani yo Maro ipootoo be si ikap di tooltool ki a ipamulu di ye so dook tiap tani yo be igarung di i.

Rau Ke Maro

© Wycliffe Bible Translators, Inc. All rights reserved

More Info | Version Index