검색 양식

Matiu 17

Yesu Tinini Ipalele

(Maka 9:2-13; Luka 9:28-36)

1Ye kene tani in, tiyepe le ke limi be atu iman a ila, motong la Yesu ikaua Pita inbe Yemis iye taini Yowan a tilo pang kawal yo kutono lo ete yege i, be lo di leu tiyepe nango. 2Tilo tiyepe le nga Yesu di galiunu tina be matadi pang ye, ngan tinini idik le san mulu le damono i pilik pilikbe ben ke matana, inbe sousoungu le wam ki nga ikoko san le ilangaraia ni ben sul nunngana. 3Ngan nen le mooloo tiap, inbe tikamata Mose iye Ilia si pombe a tiye Yesu tiwetewete.

4Motong la Pita iwete pang Yesu nen, “Tool Mai, nga dook mata ke be idi nga tayepe nanga. Kumata be ong lom nen lapau nga, ngan ole are badabada tol; atu pong, san pang Mose, inbe san pang Ilia.”

5Pita iwetewete nen pang Yesu go, inbe eng tene ikoko le pilik pilikbe, in isi le si rur ki iloko la podi. Inbe tool atu kalngana pombe eng tene tani lono in iwete nen, “Tool in au natuk. Au i lok panga mai san, inbe lok ponana ye. Le kalongo betanga ki yo be iwete pang nga!”

6Yeisa be di galiunu tilongo betanga tina, motong titattadai le tiro du tisilingan matadi pang tana. 7Bong Yesu ipa le iman potai ye di a itoko di, inbe iwete pang di nen, “Kamadit! Kin katattadai be!” 8Le nga di tol timadit a be matadi gaga, ngan tikamata tool sa mulu siap, bong tikamata Yesu ya taleu la ikododo i.

9Motong la tipa ke kawal a be tisi, ngan Yesu iwete betanga medana pang di nen, “Kin kawetewete pang tool sa ye so yo kakamata nga, ngan be. Bong iken yang leu le ilo ye lal yo be Tool Moolmool ke Maro imata a imadit mulu ye i.”

10Iwete pang di galiunu a imot, motong la titoru. Tiyei ne, “Nga yelei a di pannoongoo ke ger ke Maro tiwete be ole Ilia la be imuku a isi, lo ngan be Mesaia+ itoo nga?”

11Motong la iwete pang di nen, “Betanga in moolmool. Ilia be imuku a isi nga be si ikarata so le imot le dook mata mulu. 12Bong awete pang nen, Ilia in isi oo. Bong di tooltool tikilala dook tiap, le dada dook tiap le imot yo lodi be tiyei panga nga, ngan le tiyei panga moolmool. Ngan dada gaongo leu la be tiyei pang Tool Moolmool ke Maro a isolo urata moonoo ke masngana ye lapau nga.” 13Yesu iwete nen a imot, motong la di galiunu lodi galanga nen, ya i nga iwetewete ye Yowan yo irriu di tooltool i.

Yesu Ipasak Pang So Sadi Ngan Le Ikoo Ye Tool Kase Atu

(Maka 9:14-29; Luka 9:37-43)

14Ye kene yo Yesu iye di galiunu tol tina ngan tisi ye in nga, ngan le si pombe pang ye di tooltool budanga mai. Motong la tool atu in ipa le iman potai pang ye Yesu, inbe igun turunu du kene punu ke dama. 15Inbe iyei ne, “Tool Mai, lom pau a kulono natuk tamoto ni ngan. Ya in isolo masngana maiyoko, yesoo matan patadatada a imol du tana, inbe itangurngur. Inbe lal kapala ngan ole imol du ei le ran lono lapau. 16Le akauu pang ye di galium a be tikarata a tinini dook mata, bong ke be tikarata a tinini dook mata mulu tiap.”

17Tool tani iwete nen, motong la Yesu iyei ne, “Ona tiap! Ang di tooltool yo nookoot kayepe nga, ngan katara lomim le imede ye Maro tiap, bong lomim kap gogo dada dook tiap alunu san. Nga ole ke pi mulu be nen ngan ayang tayepe, inbe awete a kayei dada yo nen ngan mulu ye nga? Oo, kakaua kase in a iman yau me e ni.” 18Tikauu man, motong la Yesu ipasak pang so sadi tani a ikoo ye, le pattu leu, inbe kase tani in tinini dook mata mulu.

19Motong la Yesu di galiunu di leu tila ye Yesu a titoru. Tiyei ne, “Ai, nga yelei, a le be amnganga so sadi ni, ngan le ikoo ye tiap nga?”

20-21Motong la Yesu iraua betanga kidi nen, “Ang nga katara lomim medana pang Maro mai tiap san. Awete pang moolmool nen, kumata be lo medana kiang yo kataru pang Maro, in mai tiap le dawa ben kai mastet patunu leu nga, ngan ke be kawete pang kawal ni nen, ‘Kudik ye ni in, a la kukodo meneng e ni’, ngan ole ila. Le so sa yo be kasak ye be kayeii tiap, ngan tiap.”+

Yesu Iwete Mulu Be Ole Imata Lo Ngan Be Imadit Mulu

(Maka 9:30-32; Luka 9:43-45)

22Kene atu in Yesu iye di galiunu tigaua tana mai Galili, motong la iwete pang di nen, “Ole titara Tool Moolmool ke Maro la di tooltool baedi, 23a be nen ngan tiraumate a imata. Ngan ole iken ye ke ru, lo ngan be ye ke tol ki ngan ole imadit mulu ye ni ke matenge.” Ngan iwete pang di nen a tilongo le lodi modoko ye mai san.

Yesu Itar Pat Ilo Ye Depe Ke Bareme Mai Ke Sungunu

24Yesu iye di galiunu tipa mulu le lo pombe ye malala mai Kapenam, motong la di tooltool yo tiyei urata ye kaungu pat pang bareme mai ke sungunu nga, ngan man titoro Pita. Tiyei ne, “Ai, pannoongoo kiang ni kanakana ngan itar pat ke yimoongoo so pang bareme mai ke sungunu lapau, too tiap?”

25Ngan Pita iyei ne, “E, kanakana nga iyei nen.”

Motong la Pita imulu a ila pang ye rumu yo Yesu iyepe lono i nga. Ila le nga iwete touo betanga siao, inbe Yesu isangkala ye betanga. Iyei ne, “Simon, lom belei? Di tooltool yo tiyei kuto maimai pang tana maimai le imot nga, kanakana ngan pat yo tikap be tiyei urata kidi ye nga, ngan tikap ye di tooltool kidi tapdi yo tiye di tiyepe nga, too tikap ye di tooltool ke malala san?” 26Ngan Pita iyei ne, “Di tooltool ke malala san.”

Motong la Yesu iyei ne, “Ngan nen le di tooltool kidi tapdi yo tiye di tiyepe nga, ngan o ke be titar pat kidi tiap. 27Bong kumata be idi nga takap pat pang di tooltool yo tiyei urata ye kaungu pat pang bareme mai ke sungunu ngo tiap nga, ngan ole katedi malmal paidi. Le kudu du kotte ooroo kiong ke konnanga in idu ran lono a kukonana. Ngan i yo be kukona kulkulunu i, in kouu a kupakaka koonoo, ngan ole kupuske pat atu iken i tani in koonoo lono. Lo ngan be kouo pat tani, a nen ngan kouu pang di tooltool tina ye aru kanada.”

Rau Ke Maro

© Wycliffe Bible Translators, Inc. All rights reserved

More Info | Version Index