검색 양식

KALATE METATAʼA 21

Abialé Izak

(Met 17:15-21; 18:9-15; Hé 11:11-12)

1Nti a nga mvamane Sara, aval a nga jô de, a Nti a nga bo mfaʼa Sara aval a nga jô. 2Sara a nga nyoñ abum a biaé Abraham monafam e nnôme wé été éyoñ é mbe ntiñetan nje Zambe a nga kobô nye. 3Abraham a nga yôlé na Izak e monafam a nga bialé nye, e nyô Sara a nga biaé nye. 4Abraham a nga tyiʼi monafame wé Izak atyel. 5Abraham a nga bili mimbu ntet, éyoñe mone wé Izak a nga bialé. 6Eyoñe te nje Sara a nga jô na: Zambe a nga bo ma éwovioé be bôt; môt ase a ye wôʼô jame te a ye woé amu ajô dam. 7A nga beta jô na: Za a nga kôme jô Abraham na: Sara a ye nyaa *bon? Ve da me biaya nye monafam e nnôme wé été.

Agar e nkôte si

(Ga 4:21-31; Met 16; 25:12-18; Sam 146:7-9)

8Mon a nga yaé a tyi mebé. Abraham a nga kôme beta ndian e *môs Izak a nga tyi mebé. 9Sara a nga yene mone ngone yʼEjipte Agar a nga biaé Abraham a woék. 10Nye Abraham na: Titaʼane mbo ésaé minga nyô a mone wé, amu mone mbo ésaé minga nyô aa ye ke kaban élik a monafame wom Izak. 11Abraham a nga wôʼô nkobô ôte étua *abé, amu monafame wé. 12Ve Zambe a nga jô Abraham na: Te wôʼô *abé, amu monafam a mbo ésaé minga wôé. Vaʼa Sara e jam ese a ye sili wo; amu e be Izak nye wo ye bi mvoñe bôt ja ye beʼe jôé dôé. 13Ma ye fe bo mone, mbo ésaé minga wôé ngum ayoñ, amu a ne mvoñe bôte jôé. 14Abraham a nga kôlô si ndibe tyé; a nga nyoñe belet a ndeʼe mendim a nga ve Agar a beté nye bie étul; a nga kee fe nye mongô a a nga suu nye. A nga ke a jañe *nkôte si Birséba. 15Eyoñe ndeʼe mendim é nga man, a nga liʼi mongô e mon élé éziñe si, 16asu ya ke tabe si a lôô nye, nté ngalé é ne wulu, amu a mbe a jôʼô na: Me boʼo te yen ane mongô a wu! Ane ñhe a nga tabe be lôane mesu a kuli miliʼi mis. 17Zambe a nga wôʼô tyiñe monafam; a éngele Nti a nga loon Agar e yôb été a jô nye na: Jé, Agar? Te ko woñ, amu Zambe a wôʼôya tyiñe mongô, e vôm a né. 18Kôlôʼô si, nyoñe monafam, bii nye wo; amu ma ye bo nye beta ayoñ. 19Zambe a nga kui nye mis, a a nga yen anjeñe mendim; a nga ke jalé ndeʼe mendim a nyuu monafam. 20Zambe a nga too be monafam, nye ve yaé, a nga too e *nkôte si a a nga bo ñwua *élaé. 21A nga too e *nkôte si ya Parañ a nyia wé a nga luʼu nye minga, ngone yʼEjipte.

Elat Abraham a Abimélék

(Met 1:6; 12-33)

22Melu mete Abimélék baa Pikol, évete nsamba mewosane wé be too nsamba, a nga zu kobô Abraham na: Zambe a ne a wo e jam ese wo bo été. 23Kane ñhe me ngana a jôé Zambe na: Wo ye bo te duʼu ma, nge bone bam nge bendaé bam, a na wo ye liti ma *mvam a si wo te tabe; avale da ma fe ma te liti wo *mvam. 24Abraham a nga jô na: Ma ye kane de ngana. 25Ve Abraham a nga ve Abimélék bijô ajô anjeñe mendim e nde bebo bisaé bʼAbimélék be nga nyoñ a ngul. 26Abimélék a nga yalane na: Ma dimi môt a nga bo jame te, ô nji ke kate ma de a ma yeme de ve dene nyô. 27Eyoñe te Abraham a nga nyoñe mbame bone biyem a wu beta biyem a ve bie Abimélék; wôna bebaane bese be nga bo élat. 28Abraham a nga telé bitoñe beyale mintômba zamgbwale fefel; 29a Abimélék a nga jô Abraham na: Bitoñe mintômba zamgbwale wo te telé fefele bi bi ne jé? 30A nga yalane na: Wo ye kañese bitoñe beyale mintômba zamgbwale bi e mo mam ane nkañesane na ma me nga faʼa anjeñe di. 31Ajô te ba loone vôm ate na Birséba. Mvus éte, amu vôm ate be nga kanane ngana, môt ase e be nyô mbok. 32Abimélék a nga kôlô si baa Pikol évete nsamba mewosane wé a be nga bulane si Befilisteñ. 33Abraham a nga bé élé tamaris e Birséba a a nga loone jôé Nti, e Zambe a too nnôm éto. 34Abraham a nga tabe ayap e sii Befilisteñ.

Bible en langue Bulu

© LʼAlliance Biblique du Cameroun, 2007

More Info | Version Index