검색 양식

MAKABEW FƆLƆ 12

Zonatan be bɛɛn lakuraya ni Ɔrɔmukaw ye

1Tuma min na Zonatan y'a ye ko koo nunu diyara ale la, a ye mɔgɔ dɔw woloma k'u ci Ɔrɔmu, ka taga u ka teriya kɔrɔman lakuraya ni Ɔrɔmukaw ye. 2A ye bataki nin ɲɔgɔnw ci Siparita ni dugu wɛrɛw ma fana. 3O la, ciden nunu ye Ɔrɔmu sira minɛ ka taga u yɛrɛ yira jamana ɲamɔgɔw la k'a fɔ ko: «Aw ni zuwifuw tun ye bɛɛn min kɛ, sarakalasebagaw kuntigi Zonatan ni zuwifu tɔw y'an ci ka na o teriya ni bɛɛn nin lakuraya n'aw ye.» 4U tun bena jamana minw cɛtigɛ u segitɔ Zuda mara la, jamana ɲamɔgɔw ye batakiw d'u ma, u ka kan ka minw di o yɔrɔ kelen kelen bɛɛ kuntigiw ma janko olu k'u janto u la u ɲuman ka se soo.

5Zonatan ye bataki min ci Siparitakaw ma, o filɛ nin ye:

6«Sarakalasebagaw kuntigi Zonatan, ni jamana ɲamɔgɔw, ni sarakalasebagaw ani zuwifu tɔw b'u balima Siparitakaw fo. 7A mɛnna, aw ka masacɛ Areyɔsi ye bataki ci an ka sarakalasebagaw kuntigi Oniyasi ma, ko: ‹Aw k'aw yɛrɛ jati an balimaw ye, i n'a fɔ o sɛbɛ nin b'a yira cogo min na. 8Oniyasi y'aw ka ciden nin minɛ ka ɲa. Bɛɛn ni teriya koo tun fɔra sɛbɛ min kɔnɔ, a y'o minɛ. 9An fɛ, Ala ka kitabu minw b'an bolo, olu b'an jigi tugu, hali n'o bɛɛn ɲɔgɔn ma kɛ aw ni anw cɛ. 10O bɛɛ n'a ta, an ye cira nin sama janko ka bɛɛn ni teriya lakuraya. An t'a fɛ ka kɛ lonanw ye aw fɛ, bari saan caaman tɛmɛna kabini aw y'aw ka ciden ci an fɛ. 11An be to ka miiri aw la waati bɛɛ, tuma min na an be saraka bɔ, walima ka Ala dali, ɲanagwɛlonbaw la, ni ɲanagwɛlon wɛrɛw la, i n'a fɔ a bɛnnin lo balimaw ka miiri ɲɔgɔn la cogo min na. 12An nisɔndiyanin lo bari aw ye tɔgɔba sɔrɔ. 13Anw fɛ kɔni, gwɛlɛya y'an sɔrɔ, kɛlɛ sera an ma, masacɛ minw b'an lamini na, olu y'an kɛlɛ. 14An tun t'a fɛ k'aw sigɛn kɛlɛ nunu la, walima k'an jɛnɲɔgɔnw n'an teri wɛrɛw sigɛn. 15An ka dɛmɛ be bɔ Sankolotigi le fɛ, ale y'an kisi ka bɔ an juguw bolo, k'u maloya.

16«Ayiwa, sisan an ye Antiyokusi deen Numeniyusi ni Zasɔn deen Antipatɛri woloma k'u ci Ɔrɔmukaw fɛ janko k'an ka teriya n'an ka bɛɛn kɔrɔman lakuraya n'u ye. 17An y'a fɔ u ye ko u ka taga aw fɛ k'aw fo, ani k'an ka bataki di aw ma, an y'a fɔ min kɔnɔ ko an b'a fɛ ka bɛɛn ni balimaya lakuraya. 18An b'a ɲini aw fɛ, aw ka jaabi d'an ma o la.›

19«Bataki min tun cira Oniyasi ma, o filɛ nin ye: 20‹Ne Areyɔsi, Siparitakaw ka masacɛ be sarakalasebagaw kuntigi Oniyasi fo. 21An y'a ye sɛbɛ dɔ kɔnɔ, min be Siparitakaw ni zuwifuw koo fɔ, k'u ye balimaw ye, k'u bɛɛ bɔra Ibrayima la. 22An b'o lɔn sisan minkɛ, n'aw be sɛbɛ ci an ma k'aw ka kibaruya di an ma, o bena diya an ye. 23An ka jaabi filɛ nin ye: An ka begɛnw n'an bololafɛnw ye aw ta ye, aw taw ye an ta ye fana. O la, an y'a fɔ an ka cidenw ye k'u k'o lase aw ma.› »

Demetiriyusi ka kɛlɛdenw be boli Zonatan ɲa

24Zonatan y'a mɛn ko Demetiriyusi ka kɛlɛkuntigiw segira ka na a kɛlɛ ni kɛlɛden minw ye, k'u ka ca ni fɔlɔtaw ye. 25O yɔrɔnin kelen, a bɔra Zeruzalɛmu ka taga u kunbɛn Amati mara la, bari a tun t'a fɛ u ka don a ka jamana kɔnɔ cogo si la. 26A ye yɔrɔkɔlɔsibagaw ci u ka sigiyɔrɔ la. U kɔsegira ka n'a fɔ a ye ko u juguw b'u yɛrɛ labɛnna ka na bari u la sufɛ. 27Tile bentuma na, Zonatan y'a fɔ a ka mɔgɔw ye ko u ka to ɲana, k'u ka kɛlɛkɛminanw to u bolo kɔrɔ, u labɛnnin ka to kɛlɛ kama o suu bɛɛ la. A ye mɔgɔ dɔw bila k'u ka sigiyɔrɔ lamini fana, u ka to ka kɔlɔsili kɛ. 28U juguw y'a mɛn tuma min na ko Zonatan nunu labɛnnin lo ka kɛlɛ kɛ, u siranna, u jaa tigɛnin ye tasumaw mana u ka sigiyɔrɔ la, ka sɔrɔ ka boli.p 29Zonatan nunu tun m'a kɔlɔsi k'u wilila ka bɔ yen fɔɔ o dugusagwɛ, bari u tun be tasuma mananinw yera. 30Zonatan wilila ka tugu u kɔ k'u gwɛn nga a m'u sɔrɔ, bari u tun ye Eletɛri baa tigɛ ka ban.

31O kɔ, Zonatan yɛlɛmana ka taga arabu dɔw kama, u be minw wele ko zabadeɲɛw. A sera u kɔrɔ k'u bololafɛnw bɔsi. 32O kɔ tugu, a n'a ka kɛlɛdenw wilila ka bɔ yen ka taga Damasi k'o mara bɛɛ yaala. 33Simɔn fana ye taama daminɛ ka taga fɔɔ Asikalɔn n'a lamini dugu barikamanw na. A ye Zope sira minɛ ka ta'a ka mɔgɔ dɔw to dugu nin kɔnɔ. 34A tun y'a mɛn ko Zopekaw b'a fɛ ka dugu barikaman nin don Demetiriyusi ka mɔgɔw bolo. A ye kɛlɛden dɔw to yen janko u k'a kɔlɔsi.

Zonatan be barika don Zeruzalɛmu la

35Zonatan kɔsegira Zeruzalɛmu tuma min na, a ye jama cɛkɔrɔbaw lajɛn. U y'a latigɛ ɲɔgɔn fɛ k'u bena dugu barikaman dɔw lɔ Zude mara la, 36ka dɔ fara Zeruzalɛmu laminikogo jaɲa kan, ani ka kogojan lɔ ka dugu n'a yɔrɔ barikaman danbɔ ɲɔgɔn na, janko a ka to danna, Demetiriyusi ka mɔgɔw kana se ka foyi san, walima ka fɛɛn feere yen. 37Zeruzalɛmukaw y'a daminɛ ɲɔgɔn fɛ ka dugu lɔ kura ye. Dugu laminikogo tun benna yɔrɔ dɔ la, kɔɔ faan fɛ, dugu kɔrɔn fɛ. Ciin min be wele ko Kafenata, u y'o lalaga fana. 38Simɔn ye Adida dugu lɔ kura ye kulujukɔrɔ mara la. A ye barika don a la, ka koonw don a dondaw la, ka sɔgɔnanw kɛ u la.

Zonatan be ben Tirifɔn bolo

39Tirifɔn tun b'a fɛ ka Antiyokusi kɛlɛ janko ka sigi Siriba jamana kunna ka kɛ a masa ye. 40Nga a tun be siran ko a ye koo min latigɛ, ko Zonatan ben'a kɛlɛ k'a bali k'o kɛ. O la, a tun be cogo ɲinina k'a minɛ k'a faga. A ye sira minɛ ka taga Bɛtiseyan. 41Zonatan tagar'a kunbɛnyɔrɔ ni kɛlɛdenŋana mɔgɔ waa bi naani (40 000) ye a tagara se Bɛtiseyan fana. 42Tirifɔn y'a ye ko a nana ni kɛlɛden caaman ye tuma min na, a ma sɔn ka se a ma. 43A y'a kunbɛn ni boɲa ye, k'a yira a teriw bɛɛ la, ka boɲafɛnw d'a ma. A y'a ɲini a teriw n'a ka kɛlɛdenw bɛɛ fɛ ko u ka mɛnni kɛ Zonatan fɛ i n'a fɔ u be mɛnni kɛ ale fɛ cogo min na. 44O kɔ, a ye Zonatan ɲininga ko: «Mun na i ye mɔgɔ nunu bɛɛ sigɛn, k'a sɔrɔ an yɛrɛ te kɛlɛ la? 45E k'i ka kɛlɛden nunu bila ka taga soo. I ka mɔgɔ damani woloma k'i bila sira, ka na an be taga Potolemayisi. Ne bena dugu nin don i bolo, ni dugu barikaman tɔɔ nunu, ani kɛlɛdenw ni faama minw be yen halibi. O kɔ, ne bena kɔsegi, bari o le ye ne nakun ye yan.»

46Zonatan lara Tirifɔn la. Tirifɔn ye min fɔ, a y'o kɛ. A y'a ka kɛlɛdenw bila ka taga. U ye Zuda mara sira ta k'u be kɔsegi. 47A tora ni mɔgɔ waa saba (3 000) ye. O kɔ, a ye olu mɔgɔ waa fila (2 000) to Galile mara la, mɔgɔ waa kelen (1 000) minw tora, u y'a bila sira. 48Zonatan donna Potolemayisi dɔrɔn, dugumɔgɔw ye dugu dondaw tugu. U ye Zonatan minɛ, mɔgɔ minw bɛɛ tun donna n'a ye, u ye olu faga. 49Tirifɔn ye kɛlɛden sennatigiw ni sotigi dɔw ci Galile mara la ni kɛnɛbayɔrɔ la, ko u ka Zonatan ka kɛlɛdenw bɛɛ faga. 50Olu y'a faamu ko Zonatan tun minɛna, ko ale n'a tɔɲɔgɔnw fagara. U ye ɲɔgɔn jaa gwɛlɛya, ka to ka taga ɲa, u labɛnnin kɛlɛ kama. 51U kɔgwɛnbagaw y'a ye tuma min na k'u be sɔn ka kɛlɛ kɛ fɔɔ ka sa, o la, u kɔsegira. 52Zuwifuw ka kɛlɛdenw bɛɛ segira Zude mara la hɛrɛ la. U ye Zonatan n'a tɔɲɔgɔnw suu kasi, siranya y'u minɛ kosɔbɛ. Isirayɛlidenw bɛɛ tun ye sanga kɛ kosɔbɛ. 53U lamini siyaw bɛɛ tun be cogo ɲinina k'u halaki. U tun b'a fɔra ko: «Ɲamɔgɔ t'u fɛ tugu, dɛmɛbaga t'u fɛ tugu. An k'u kɛlɛ sisan k'u faga, janko mɔgɔ si kana miiri u la tugu.»

ALA KA KUMA

© 2008 Alliance Biblique du Burkina Faso

More Info | Version Index