검색 양식

Sir 37

Terisɔbɛ ani teriɲuman

1Terimanw bɛɛ b'a fɔ ko:

«N teri le y'i ye.»

K'a sɔrɔ dɔ ta ye tɔgɔ dama ye.

2Dusukasi jumɛn le be yen min be se ka mɔgɔ faga?

O ye i teri ka yɛlɛma ka kɛ i jugu ye.

3An ka miiriyajugu juu bɔra min,

fɔɔ ka dugukolo fa namara la?

4Teri be nisɔndiya n'a teri ye hɛrɛ waati la,

ni dusukasi sera, a be wili a kama.

5Teri dɔ be sɔn ka tɔɔrɔ muɲu n'a teri ye dumuni kosɔn,

nga ni kɛlɛ wilila, a b'a yɛrɛ tangayɔrɔ ɲini.

6K'i to kɛlɛ la, kana ɲinɛ i teri kɔ,

i hakili to a la i ka nafolo cɛwaati la.

Ladiliw

7Ladibaga kelen kelen bɛɛ be miiri

k'olu ta le ka ɲi,

nga dɔw b'u ta kɛ u yɛrɛ ka tɔnɔ kama.

8O la, e k'i yɛrɛ kɔlɔsi i ladibaga la,

banba k'a ka laɲinita lɔn fɔlɔ.

Bari, a ɲaa b'ale dama ka nafa le la.

Kan'a to a k'i niyɔrɔ kɛ a yɛrɛ ta ye,

9ani k'a fɔ i ye ko: «Tiɲɛ b'i fɛ,»

ka sɔrɔ ka taga lɔ yɔrɔjan k'i laban cogo filɛ.

10I dimi be mɔgɔ min na,

kana hakili ɲini o tigi fɛ.

E ka kolatigɛninw dogo i keliyabagaw la.

11Kana sɔn ka hakilila ɲini muso fɛ

a sinamuso ka koo la,

kana kɛlɛ hakilila ɲininga fagobagatɔ fɛ,

kana sɔn ka fɛɛn sɔngɔ ɲininga jagokɛla fɛ,

kana sɔn ka fɛɛn sɔngɔ ɲininga a sanbaga fɛ,

kana ɲumanlɔnko ɲininga wasabali fɛ.

Kana ɲumanya ɲininga hinɛbali fɛ,

kana baarako ɲininga salabagatɔ fɛ.

Mɔgɔ min b'a ka sara sɔrɔ fɔɔ saan laban na,

kana sɔn k'o tigi ɲininga baara banwaati la,

kana baaragwɛlɛn koo ɲininga soo kɔnɔ baaradenkolon fɛ.

Kana ladili ɲini olu si fɛ k'i jigi la a kan.

12Nga to ka taga Alaɲasiranbaga fɛ,

e b'a lɔn ko mɔgɔ min be sariya bato,

min ka miiriya n'i ta ye kelen ye,

ale kɔni bena fara i kan i ka sigɛn na.

13E dusu sɔnna koo min ma kosɔbɛ, e jigi la o kan,

bari mɔgɔ wɛrɛ te yen tugu

min tilennin lo i ye ka tɛmɛ ale kan.

14Mɔgɔ dusu b'a lasɔmi kosɔbɛ,

ka tɛmɛ kɔlɔsilikɛlaw yɛrɛ kan

minw be kogo kan.

15O la do, a ɲini Fɛɛn bɛɛ kuntigi fɛ,

a k'i seen bila siraɲuman kan.

Lɔnniyasɔbɛ

16Sɔsɔli be kɛ fɔlɔ ka sɔrɔ ka baara bɛɛ daminɛ,

sanni ka koo o koo kɛ,

kɔn ka miiri fɔlɔ.

17Miiriya be bɔ dusu le la.

18A be kɛ sababu ye koo naani dɔ be wili,

min ye: Koɲuman ni kojugu,

ani saya ni balo ye.

Min b'o latigɛ, o ye mɔgɔ daa ye.

19Mɔgɔ dɔw be se mɔgɔ wɛrɛ kalan la,

nga u te se ka foyi kɛ u yɛrɛ ye.

20Kuma caaman tigi b'a yɛrɛ koo goya mɔgɔ ye

fɔɔ a t'a daladumuni sɔrɔ yɛrɛ.

21A ma dɛmɛ sɔrɔ ka bɔ Ala fɛ,

a koo te se ka diya mɔgɔ wɛrɛ ye,

lɔnniya fana t'a fɛ hali dɔɔni.

22Mɔgɔ dɔ be koo lɔn,

nga o be kɛ a yɛrɛ ka tɔnɔ dama kama.

A be min sɔrɔ, a hakili la

k'o ye a yɛrɛ ka nafa ye.

23Nga dɔ ka lɔnniya b'a ka jama nafa,

miiri min be bɔ a hakili la, o ka ɲi.

24Mɔgɔ min be koo lɔn,

o tigi ta ɲana,

mɔgɔ o mɔgɔ man'a ye,

o b'a fɔ ko a dagamuna.

25Mɔgɔ sii tile daa be se ka jati,

nga Isirayɛli ta te se ka jati.

26Mɔgɔ min be koo lɔn,

o tigi ka jama jigi b'a kan,

a tɔgɔ fana bena wele kudayi.

Mɔgɔɲumanya

27Ne deen, i yɛrɛ kɛ mɔgɔsɔbɛ ye e sii kɔnɔ,

fɛɛn min ma ɲi e fɛ,

e ka ban o la.

28Bari, koo bɛɛ te bɛɛn mɔgɔ bɛɛ ma,

bɛɛ man di mɔgɔ bɛɛ ye fana.

29Kana kɛ wasabali ye fɛnɲumanw koo la.

Kana girin dumuni kan.

30Bari, dumuni kɛkojugu be na ni bana ye,

a damatɛmɛ be na ni fɔɔnɔ ye.

31Mɔgɔ caaman sara nugubatɔya kama.

Mɔgɔ min b'a yɛrɛ minɛ,

o tigi be sijan sɔrɔ.

ALA KA KUMA

© 2008 Alliance Biblique du Burkina Faso

More Info | Version Index