검색 양식

NA TIKO MAI NA LEKUTU 11

Era sa didi na tamata, a sa kati ira na bukawaqa i Jiova, 1-3. Era sa kusikusima vakaca na tamata, 4-9. Ni sa masu ko Mosese, ka lesia eso na tamata ko Jiova, me ra veivuke kaya, 10-17; a sa yalataka na lewe ni manumanu, 18-23. Sa soli na Yalo vei ira na qase sa lesi, 24-30. Sa soli na lewe ni manumanu, 31,32; era sa qai cudruvi ko ira na tamata, 33-35.

1A ra sa didi na tamata, a sa cata ko Jiova: ia sa rogoca ko Jiova; ka sa waqa mai na nona cudru; a sa kana mate e na kedra maliwa na bukawaqa i Jiova, a sa kani ira eso e nai yalayala ni tikotiko. 2A ra sa tagi vei Mosese na tamata; a sa vakamamasu vei Jiova ko Mosese, a sa boko na bukawaqa. 3A sa vakatokai na yaca ni yasana ko ya ko Tapera [A kama]: ni sa kana mate na bukawaqa i Jiova e na kedra maliwa.

4Era sa qai kusikusima ko ira na dui kaikai era sa tiko vata kei ira: a ra sa tagi tale ko ira talega na Isireli, ka kaya, Ko cei ena vakani keda e na lewe ni manumanu? 5eda sa nanuma tiko na ika, eda a kania vakailoa mai Ijipita; na kiukaba, kei na meloni, kei na liki, kei na varasa, kei na kaliki: 6ia oqo, sa mamaca mai na yaloda: sa sega tale na ka me da kania, na mana walega oqo. 7Ia na mana sa vaka na sore ni koriada, kei na rokana sa vaka na roka ni mata-ni-civa. 8Era a lako voli na tamata ka tomitomika, ka qaqia e nai qaqi, se lauvutu e na sedre, ka vavia e na bilo, ka bulia me keki: ia ni sa tovolei, sa vaka na kakana sa caka vata kei na waiwai. 9Ia ni sa lutu ki nai tikotiko na tegu e na bogi, sa qai qeqera mai na mana.

10A sa rogoca na nodra tagi na tamata ko Mosese e na nodra veimataqali, a tamata yadua mai na katuba ni nona vale laca: a sa waqa vakalevu na cudru i Jiova: a sa cata talega ko Mosese. 11A sa kaya vei Jiova ko Mosese, A cava ko ni sa vakararawataki au kina na nomuni tamata? ia ka cava ko ni sa sega ni lomani au kina, kemuni sa tauca kina vei au na kedrai colacola bibi na tamata kecega oqo? 12Au sa kunekunetaka beka na tamata kecega oqo? se'u sa vakatuburi ira, mo ni kaya kina vei au, Mo keveti ira voli e na lomaseremu, me vaka sa keveta na luvena sa sucu tiko e dua na tamata, ki na vanua ko a bubului kina kivei ira na nodra qase? 13Au na rawata maivei na lewe ni manumanu, me'u solia vei ira kecega na tamata oqo? ni ra sa tagi mai vei au, ka kaya, Mo solia vei keimami na lewe ni manumanu me keimami kania. 14Au sa sega ni rawata me'u kauti ira kecega na tamata oqo vakataki au ga, sa rui bibi vei au. 15Ia kevaka kemuni sa cakacaka vakaoqo vei au, mo ni vakamatei au sara mada, kevaka kemuni sa lomani au; ia me'u kakua ni kunea na noqu vakaloloma.

16A sa kaya vei Mosese ko Jiova, Mo soqona vata vei au e lewe vitusagavulu maivei ira na qase ni Isireli, o ira ko sa kila era sa qase vei ira na tamata, ka turaga vei ira; ka kauti ira ki na vale ni veitavaki, me ra tu vata kina kei iko. 17Ia ka'u na lako sobu ka vosa vei iko maikea: ia na Yalo sa tiko vei iko ka'u na solia vakakina vei ira; ia era na colata vata kei iko na kedrai colacola bibi na tamata, mo kakua kina ni colata vakataki iko ga. 18Ia mo kaya vei ira na tamata, Dou vakasavasavataki kemudou ka waraka na mataka, dou na qai kana lewe ni manumanu: ni dou a tagi e na daliga i Jiova, ka kaya, Ko cei me vakani keda e na lewe ni manumanu? ni da sa vinaka tiko mai Ijipita: ena qai vakani kemudou ko Jiova e na lewe ni manumanu, ia dou na kania. 19Dou na sega ni kania bogi dua walega, se bogi rua, se bogi lima, se bogi tini, se bogi ruasagavulu: 20ena dua dina na vula taucoko, ka me luaraki mai na ucumudou, ka na velavela vei kemudou: ni dou sa beci Jiova, ko koya sa tiko vata kei kemudou, a sa tagi e matana, ka kaya, A cava eda sa lako mai kina mai Ijipita?

21A sa kaya ko Mosese, O ira na tamata ka'u sa tiko kaya, era sa oba vakaonosagavulu era sa taubale; ia kemuni sa kaya, Au na solia vei ira na lewe ni manumanu, me ra kana tiko kina ka dua na vula taucoko. 22Me na vakamatei beka na qele ni sipi kei na pulumokau me kedra, me rauti ira? se na kumuni vata beka na ika kece mai na wasawasa me kedra, me rauti ira? 23A sa kaya vei Mosese ko Jiova, Sa lekaleka beka mai na liga i Jiova? ko na raica e na gauna oqo se na yaco dina vei iko na noqu vosa, se segai.

24A sa lako yani ko Mosese, ka tukuna vei ira na tamata na vosa i Jiova, a sa vakasoqoni ira vata e le vitusagavulu maivei ira na qase ni tamata, ka sa vakatikori ira me ra volita na Vale tabu. 25A sa lako sobu ko Jiova e na o, a sa vosa vua, ia na Yalo sa tiko vua, sa solia vakakina vei ira na qase e lewe vitusagavulu: ia ni sa toka ga vei ira na Yalo, era sa parofisai, ia era sa sega ni vakaruataka. 26A sa tiko ga e nai tikotiko e le rua vei ira na qase sa volai; a yacana e dua ko Elitati, a yacana nai karua ko Metati, ka rau a sega ni lako yani ki na Vale tabu: ia sa lutu vei rau na Yalo ka rau sa parofisai e loma ni tikotiko. 27A sa cici yani e dua na cauravou, ka tukuna vei Mosese, ka kaya, O Elitati kei Metati, erau sa parofisai tiko e loma ni tikotiko. 28A sa kaya ko Josua na luve i Nuni, o koya sa dauqaravi Mosese, e dua vei ira na nona cauravou, I Mosese, noqu turaga, mo tarovi rau. 29A sa kaya vua ko Mosese, Ko sa vuvu e na vukuqu, ne? e vinaka mada ke ra sa parofita na tamata kecega i Jiova, ka solia vei ira na Yalona ko Jiova. 30A sa lako ki loma ni tikotiko ko Mosese, kei ira vata kaya na qase ni Isireli.

31A sa lako mai vei Jiova e dua na cagi, ka cagina eso na toa kila mai na wasawasa, ka vakalutuma me volita nai tikotiko; ia na kena yawa na vanua era sa kune kina sa rauta na lako e na dua na siga taucoko, ia na kena cecere mai na qele sa rua na kiupiti. 32A ra sa ia tiko na tamata e na siga taucoko ko ya ka bogivaka, ka sigavaka tale, ka baci bogivaka ni ra sa kumuna vata na toa kila: o koya sa vaka lailai sa kumuna e tini na omeri: a ra talaucaka me kedra e na veiyasana ka volita nai tikotiko. 33Ni ra sa covuta tiko na lewe ni manumanu, ka sa bera ni mama, sa waqa mai na cudru i Jiova vei ira na tamata, a sa vakayacora vei ira na tamata ko Jiova e dua na mate levu sara. 34A sa vakatokai na yaca ni tikina ko ya ko Kipiroci-ateva: ni ra a buluti ira kina na tamata era kusikusima.

35Era sa toki na tamata mai Kipiroci-ateva, ka lako ki Eseroci; a ra sa tiko mai Eseroci.

Vakavakadewa Makawa

©1974 Bible Society of the South Pacific

More Info | Version Index