검색 양식

Jolebi 2

Yalo Rwot kede Giamia me Alos

1Ka ngatamoro mito yalo Rwot kede alos, miero kong eriege eko doko alos kame konungo. Di do en eko onyo iye mo me olibeti, di eko keto iye odok angwe kur, 2di eko tere but josaseredoti awobe ka Aaron. Ngasaseredoti atie timo tic bino juko alos pong cinge di mo kede odok angwe kur tie iye, di en eko wange i wi alutari di yiro mere ko duny. Dul atitidi nono nyuto be akadi kodong da kotieko yalo but Rwot. Ngwece me giayala awanga nono yomo cuny Rwot. 3Alos ace kodong bino bedo me ka Aaron kede awobe mege, gin josaseredoti; manono obedo dul kacil twatwal pien kokwanye ki kom giayala awanga but Rwot.

4Ka dano moro tie mino giayala me mugati kame kotedo, miero time abongo arup. Kitwero bedo mugati apek kame kotimo kede alos kame konyalo kede mo me olibeti, arabo kitwero bedo perepere di kowiro mo i kom gi.

5Ka giayala kame dano tie mino obedo mugati kame kotedo kede itatany, miero time kede alos kame konungo di oko nyale kede mo, abongo arup iye. 6Poore enyonyoto en di eko onyo iye mo ka etie tere bala giayala.

7Ka giayala obedo mugati kame kotedo kede sepula, miero time kede alos kame konyongo kede mo. 8Dano bino tero manoni bala giayala but Rwot di eko mine but ngasaseredoti, di ngasaseredoti ko tere i alutari. 9Ngasaseredoti bino kwanyo dul atitidi me giayala nono, di en eko wange i alutari di yiro mere ko duny. Dul atitidi nono nyuto be akadi kodong da kotieko yalo but Rwot. Ngwece me giayala awanga nono yomo cuny Rwot. 10Dul kodong me giayala bino bedo me ka Aaron kede awobe mege, gin josaseredoti; manono obedo dul kacil twatwal pien kokwanye ki kom giayala awanga but Rwot.

11Giayala dedede me alos kame kotie tero i nyim Rwot poore bedo abongo arup; pien likame ipoore keto arup amoto mokic i kom giayala awanga but Rwot. 12Itwero da mino gi but Rwot bala giamia me kodi ageo cek, do likame ipoore wango gi i wi alutari pi mino ngwece gi yomo cuny Rwot. 13Miero iket munyo i kom giayala ni dedede me alos, pien munyo cungo pi isikan wu kede Rubanga; miero iket munyo i giayala ni dedede. 14Ka itie mino giayala me alos bala kodi ogeo cek i poto, miero iteri alos kame kocelo i mac di oko riege di egwai. 15Ipoore onyo iye mo me olibeti di iko keto iye odok angwe kur; manono obedo giayala me alos. 16Ngasaseredoti bino kwanyo dul atitidi me alos kame koriego di gwai nono, karacel kede mo kede odok angwe kur, di eko wange di yiro mere ko duny. Manono obedo giayala awanga but Rwot.

Baibuli I Leb Kumam

© 2013 Bible Society of Uganda

More Info | Version Index