검색 양식

Éxodo 34

Tachi Akꞌõrepa awaraa mãu pꞌepꞌedee omé Moisemaa oopida

1Ma tꞌẽepai Tachi Akꞌõrepa Moisemaa mãgaji:

—Mãu pꞌepꞌedee omé óoji mɨa pɨmaa naaweda teedakꞌa. Made mɨa pꞌãitꞌee ma mãu pɨa ãrikꞌoodade pꞌã badakꞌa. 2Nu tapꞌeda wã́ji Sinaí ee nokꞌodee mɨ ome unude. 3Ituaba wãipia bɨ. Eperã apida pɨ ome wãikꞌaraa bɨ. Ma awara ma ee kꞌĩrapite pꞌakꞌa wa oveja pꞌũajara kꞌodaikꞌaraa bɨda aji.

4Moisepa mãu pꞌepꞌedee omé naawedapemakꞌa oo pꞌe iru bakꞌãri, aɨ norema tapꞌeda ma mãu omé ataji mãikꞌaapa wãji Sinaí ee nokꞌodee Tachi Akꞌõrepa jaradakꞌa. 5Mãpai jɨ̃ararade Tachi Akꞌõre baai cheji. Mama baji Moisés ome mãikꞌaapa Moisemaa ichi tꞌɨ̃ golpe jaraji. 6Moisés kꞌĩrapite nãga golpe jara wãyaaji:

—¡Mɨta Tachi Akꞌõre, Mɨta Tachi Akꞌõre! ¡Mɨ, Tachi Akꞌõre tꞌãri pia bapari; chupɨria kꞌawaayaa bapari; isapai kꞌĩraukꞌaa; eperãarã kꞌinia iru bapari; mɨa jara bɨkꞌa ichita oopari! 7Mapa eperãarã mɨde ijãapataarã mɨa ichita kꞌinia pꞌe iru bapari, ãradeepa uchiadaitꞌeerã jõmaweda paara. Mɨa ãrapa pꞌekꞌau kꞌachia oopata awaraa ne–inaa kꞌachia oopata ome ãyaa bɨpari, mɨde ijãadai naaweda, mɨa jara bɨkꞌa oodaamaa pꞌanajida mĩda. Mamĩda mɨa ne–inaa kꞌachia oopari pꞌekꞌau kꞌachia oopataarãmaa, ãchi warrarãmaa, ãichakꞌeerãmaa, mãɨrã warrarãmaa paara.

8Moisepa mãga ũrikꞌãri, Tachi Akꞌõre kꞌĩrapite bedabaidachi tau bɨɨrɨ eujãde tꞌõbairumaa mãikꞌaapa irumaa nãgá ɨtꞌaa tꞌɨ̃ji:

9—Tachi Akꞌõre, pɨa wãara mɨ pia akꞌɨpari pɨrã, tai ome nipaparíiji. Wãara jã eperãarã audú kꞌɨɨrɨ kꞌisua pꞌanapata. Mamĩda chupɨria kꞌawáaji mãikꞌaapa taipa ne–inaa kꞌachia oopata ãyaa bɨ́ji. Tai ome bapariipáde aji, tai pɨchi eperãarã perã.

Tachi Akꞌõrepa israelitaarãmaa jara pëida

10Tachi Akꞌõrepa Moisemaa mãgaji:

—Mɨa jararu pia ũríji, pɨa israelitaarãmaa jaranaitꞌee perã. Mɨa parã ome pacto ooitꞌee. Parã tꞌãide mɨa oopariitꞌee ne–inaa eperãarãpa pꞌoyaa oodakꞌaa ãchi juadoopa. Mãgee ne–inaa awaraa eujãdepemaarãpa ãchi tꞌãide waide unudakꞌaa. Awaraa pꞌuuru pidaarã parã ikꞌaawa pꞌanapataarãpa mãga unudakꞌãri, kꞌawaadaitꞌee mɨ, Tachi Akꞌõrepa ne–inaa jõma oopari. 11Parãpa mɨa jara bɨkꞌa óotɨ. Mãga ooruta pɨrã, mɨa parãmaa eujã teeitꞌee bɨdeepa nãgɨɨrã jërekꞌooitꞌee: amorreorã, cananeorã, hititaarã, ferezeorã, heveorã mãikꞌaapa jebuseorã. 12Mamĩda parãpa pacto oodaikꞌaraa bɨ mãgɨɨrãdepema apidaa ome. Mãɨrã ome pacto ooruta pɨrã, parã kꞌachiade baaidaitꞌee. 13Ãra ome pacto oodai kꞌãyaara, ãrikꞌóotɨ ãra ɨtꞌaa tꞌɨ̃pata altar, mãu awara bɨdapꞌedaa ãchi akꞌõre waibɨa apataarã–itꞌee mãikꞌaapa pakꞌuru awara bɨdapꞌedaa ãchi nawe waibɨa apata Asera–itꞌee. 14Ãra akꞌõre waibɨa apataarã apidaamaa ɨtꞌaa tꞌɨ̃náatɨ, mɨa mɨchi eperãarã jiwaapari perã. Mapa mɨ tꞌɨ̃jarapata: “Tachi Akꞌõrepa ichideerã jiwaapari”.

15’Ma eujãdepemaarã ome pacto oonáatɨ. Ãra ome pacto ooruta pɨrã, ãrapa parãmaa jaradai aukꞌa ɨtꞌaa tꞌɨ̃ chedamerã mãikꞌaapa ne–animalaarã tee chedamerã ãchi akꞌõre waibɨa apataarã–itꞌee. Maa–e pɨrã parãmaa jara pëidai aukꞌa kꞌo chedamerã ne–animalaarã ãra akꞌõre waibɨa apataarã–itꞌee paadapꞌedaadepema. 16Ma awara parãpa ãra kꞌaurã jɨrɨdai parã warrarã ome miakꞌãidamerã. Mãgá ãra kꞌaurãpa parã warrarãmaa aukꞌa ãchi akꞌõre waibɨa apataarãde ijãapidai mãikꞌaapa mãgɨ́ ne–inaamaa ɨtꞌaa tꞌɨ̃pidai, mɨmaa aupai ɨtꞌaa tꞌɨ̃dai kꞌãyaara.

17’Maarepida ne–inaa metaldee oonaadapáde aji, aɨ kꞌĩrapite ɨtꞌaa tꞌɨ̃daitꞌee.

Tachi Akꞌõrepa jarada año chaa fiesta oodamerã

18’Pan levadura wẽe kꞌopata fiesta oodaipia bɨ mɨa jaradakꞌa. Ewari siete wãyaaru misa, pan levadura wẽe kꞌodaipia bɨ. Mãga oodaipia bɨ aviv atanede, ma atanede parã israelitaarã Egipto eujãdeepa uchiadapꞌedaa perã.

19’Israelitaarã warrarã naapemaarã jõmaweda mëré. Ichiaba parã ne–animalaarã ɨmɨkꞌĩraarã naapɨara tꞌorutaarã mëré: pꞌakꞌaarã, ovejaarã, chivoorã paara. 20Burro ɨmɨkꞌĩra naapɨara tꞌoru pɨrã, ma burro chakꞌe pari oveja chakꞌe maa–e pɨrã chivo chakꞌe teedaipia bɨ. Chiparipa mãga ooamaa bɨ pɨrã, ma burro chakꞌe o kꞌõratꞌaadaipia bɨ. Parã warra naapemaarã kꞌapꞌɨa pari ne–inaa teedaipia bɨ. Apida mɨmaa ne–inaa wẽe chedaikꞌaraa bɨ.

21’Ewari seis mimiadaipia bɨ. Mamĩda ewari sietede ɨ̃idaipia bɨ, ne–uupata ewari pɨjida maa–e pɨrã ne–uudapꞌedaa ewapata ewari pɨjida.

22’Fiesta Tomia apata oodakꞌãri, trigo naapɨara ewadapꞌedaa mɨmaa tee chedaipia bɨ mãikꞌaapa año jõ wãkꞌãri, netꞌa tau naapɨara ewadapꞌedaa ichiaba mɨmaa tee chedaipia bɨ.

23’Año chaa israelitaarã ɨmɨkꞌĩraarã jõmaweda cheda õpee mɨ kꞌĩrapite chedaipia bɨ, mɨta israelitaarã Akꞌõre Waibɨa perã. 24Mɨa awaraa eujãdepemaarã parã israelitaarã eujãdeepa jërekꞌooitꞌee mãikꞌaapa parã eujã waibɨara papiitꞌee. Ma awara parã mãgá cheda õpee mɨ kꞌĩrapite chedakꞌãri, apidaapa parã eujã kꞌɨ̃ada–e paitꞌee.

25’Mɨ–itꞌee ne–animalaarã paapi chedakꞌãri, ma ne–animalaarã waa paadaikꞌaraa bɨ pan levadura ome ooda ome. Ichiaba Pascua fiesta oodakꞌãri, ma ne–animal paadapꞌedaadepema chiara maarepida ɨa bɨdaikꞌaraa bɨ aɨ noremapema–itꞌee.

26’Parãpa ne–uudapꞌedaadepema naapɨara ewadapꞌedaa pipɨara bee atéetɨ mɨ, parã Akꞌõre Waibɨa ɨtꞌaa tꞌɨ̃pata temaa.

’Cabra chakꞌeerã peedapꞌeda, chi nawe jubade chuunaadapáde aji.

Moisepa Tachi Akꞌõre ley pꞌãda

27Tachi Akꞌõrepa Moisemaa mãgaji:

—Mɨ ley pꞌãpáde aji, ma ley kꞌaurepa mɨa pacto ooda perã pɨ ome mãikꞌaapa israelitaarã ome.

28Moisés Tachi Akꞌõre ome beeji Sinaí ee nokꞌode kꞌãima cuarenta; nekꞌo–ee mãikꞌaapa ne–inaa to–ee. Mama bɨde ma mãu pꞌepꞌedee omeede ley diez pꞌãji. (Deuteronomio 10.4) 29Maapꞌeda Moisés ma mãu ome edaa cheji. Iru kꞌĩra ɨ̃daa baji Tachi Akꞌõre ome bada perã. Mamĩda Moisepa kꞌawa–e baji ichi kꞌĩra ɨ̃daa bɨ. 30Aaronpa apemaarã israelitaarã ome Moisés kꞌĩra mãga unudakꞌãri, pꞌeradachida. Mapa iru kꞌaitꞌa wã kꞌiniada–e paji. 31Mamĩda Moisepa tꞌɨ̃kꞌãri, Aarón, israelitaarã poro waibɨarã ome irumaa wãjida mãikꞌaapa iru ome pedeejida. 32Tꞌẽepai israelitaarã jõmaweda irumaa wãdakꞌãri, Moisepa jõma nepɨrɨji Tachi Akꞌõrepa ichimaa jarada ee nokꞌode bakꞌãri.

33Pedee aupakꞌãri, ichi kꞌĩra pꞌarupa wãkꞌaji. 34Mamĩda Moisés Tachi Akꞌõre kꞌĩrapite tꞌĩukꞌãri iru ome pedeeitꞌee, ma pꞌaru ãyaa bɨpachi. Mãgá Tachi Akꞌõrepa jarada israelitaarãmaa nepɨrɨnakꞌãri, 35ãrapa iru kꞌĩra ɨ̃daa unupachida. Maapꞌeda ichi kꞌĩra pꞌarupa wãkꞌapachi waya Tachi Akꞌõre kꞌĩrapite tꞌĩurumaa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index