검색 양식

LEVITIKE 10

Bara ba babedi ba Aarone ba timetswa ke mollo wa Jehova.

1Nadabe le Abihu, bara ba Aarone, ba nka e mong le e mong pitsana ya ho tjhesa dibano, ba okga mollo ka tsona, ba ntoo di tshela ka dibano, mme ba hlahisa pela Jehova mollo osele, e le seo a sa kang a ba laela sona. 2Yaba mollo o tswa pela Jehova, wa ba tjhesa; mme ba eshwa pela Jehova.

3Moshe a re ho Aarone: Ke seo Jehova a na beng a se boletse, a re: Ke tla halaletswa ka ba emang pela ka, mme ke tla hodiswa mahlong a setjhaba kaofela. 4Aarone a kgutsa. Moshe a bitsa Mishaele le Eltsafane, bara ba Usiele, rangwana Aarone, a re ho bona: Atamelang, mme le jarele banababo lona hole le sehalalelo, kantle ho diahelo. 5Ba atamela, ba ba jarela kantle ho diahelo, ka dikojwana tsa bona, kamoo Moshe a laetseng kateng.

6Moshe a re ho Aarone le ho Eleasare le Ithamare, bara ba hae: Le se ke la rola hloohong tsa lona, le se ke la hahola diaparo tsa lona, hore le tle le se ke la shwa, mme Jehova a tle a se ke a halefela phutheho kaofela; lesang banababo lona, ba ntlo ya Iseraele kaofela, ba lle hodima tjheso e kgolo e tukisitsweng ke Jehova. 7Le se ke la tloha monyako wa tente ya pokano, hore le tle le se ke la shwa; etswe ole ya tlolo e dutse hodima lona. Ba etsa ka polelo ya Moshe.

Aarone le bara ba hae ba laelwa hore ba se nwe veine, ha ba ya kena tabernakeleng. — Dikarolo tsa mahlabelo le tsa dinyehelo tseo ba di abelwang.

8Jehova a bua le Aarone, a re: 9O se ke wa nwa veine, leha e le jwala, wena, leha e le bara ba hao, bao o nang le bona, ha le se le tla kena tenteng ya pokano, hore le tle le se ke la shwa. Ke taelo ya kamehla melokong ya lona yohle e tlang ho tla, 10hore le tle le tsebe ho lemoha se kgethehileng, le se sa kgethehang, le se sa hlwekang, le se hlwekileng; 11le ho ruta bana ba Iseraele melao yohle eo Jehova a ba laetseng yona ka molomo wa Moshe.

12Moshe a re ho Aarone le ho Eleasare le Ithamare, bara ba hae ba babedi ba pholohileng: Nkang nyehelo e setseng ya mahlabelo a tjheseditsweng Jehova, mme le e je e sa lomoswa, kathoko ho aletare; hobane e halalela haholo. 13Le tla e jela nqalong e kgethehileng, hoba e le kabelo ya hao, le kabelo ya bara ba hao mahlabelong a tjhesetswang Jehova, hobane ke laetswe jwalo. 14Haele sefuba se tsokoditsweng, le letsoho le emisitsweng, le tla di jela nqalong e hlwekileng, wena le bara ba hao, le baradi ba hao hammoho le wena; hobane di neilwe lona, e le kabelo ya hao, le kabelo ya bara ba hao mahlabelong a teboho a bana ba Iseraele. 15Kantle ho mahlabelo a tjheswang a mafura, ba tla tlisa letsoho le emiswang le sefuba se tsokotswang, di tle di hlahiswe ka tsokotso pela Jehova; e tla ba tsa hao le tsa bara ba hao, ka taelo ya kamehla, kamoo Jehova a laetseng kateng.

16Moshe a botsa phooko ya sehlabelo sa sebe; empa a fumana hobane ba e tjhesitse. 17Yaba o halefela Eleasare le Ithamare, bara ba Aarone ba pholohileng, a re: Ha le a ka la ja keng phooko ya sehlabelo sa sebe nqalong e halalelang? athe ke ntho e halalelang haholo; Jehova o le neile yona, hore le tle le tlose sebe sa phutheho, mme le e etsetse pheko ka yona pela Jehova. 18Bonang, esita le madi a yona ha a ka a tliswa kahare ho sehalalelo; athe le ka be le jele sehlabelo seo sehalalelong, kamoo ke laetseng kateng. 19Yaba Aarone o re ho Moshe: Bona, kajeno ba hlahisitse sehlabelo sa bona sa sebe le setjheso sa bona pela Jehova, mme haele moo ke hlahetswe ke taba tse itseng, na kajeno ke be nka ja jwang sehlabelo sa sebe? Na e ne e tla ba ntho e ntle mahlong a Jehova na? 20Ha Moshe a utlwa hoo, a ba kgotso.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index