검색 양식

Numbers 34

Pi Mathil ko Binaw

1I yog SOMOL ngak Moses, 2ni nge yog ngak e girdi’ nu Israel, ni nge ga’ar ngorad, “Nap’an ni gimed ra yan nga langgin yu Kanaan, ni fare binaw ni nggu pi’ ngomed, ma ba’aray e gin ni nge yan e pi mathil ko binaw romed riy. 3Mathil u yimuch e tabab ko ted nu Zin nge waliy e mathil nu Edom. I tabab ko ngek u taban e leyni yimuch ko Dead Sea. 4Me cheal ko yimuch nge sor nga thilin e but’ u Akrabbim nge yan i pag yu Zin nge yan ko yimuch u Kadesh Barnea. Miki cheal ko lel’och ni ngal nge sor nga Hazar Addar me yan u rom nga Azmon, 5ni iraram gin ni cheal riy nge sor ko loway ko mathil nu Egypt nge yan i mus ko day ni Mediterranean.

6“Mathil ko ngal e fare gi day ni Mediterranean.

7“Ma mathil u lel’och e nge tabab ko Mediterranean nge yan i mada’ ko Burey nu Hor 8me yan urom ko wa’ u thilin e but’ u Hamath. Miki ul ul i yan nga Zedad 9nge taw nga Zifron, me yan i mus nga Hazar Enan.

10“Ma mathil ko ngak e tabab u Hazar Enan nge yan u rom nga Shefam. 11Me yan ko yimuch nga Harbel, meyan ko ngek u Ain, me yan u rom ko yochi burey ni ba’ ko ngek u mirichlen e lipath nu Galilee, 12ma aram me yan ko yimuch ni be waliy e lul’ nu Jordan nge yan ko Dead Sea.

“Nge par ni irera’ e re aningeg i mathil ko binaw romed.”

13Ma aram me ga’ar Moses ngak fapi girdi’ nu Israel, “Irera’ e binaw nrayag ngomed nike duwgil iip ko pow ni kan girengiy, ni fare binaw ni SOMOL e ke turguy ni ngan pi’ ko fa mereb nge balay e ganong.- 14Ma ganong rok Ruben nge Gad nge ley ni ngek e ganong rok Manasseh e kar feked e tirorad e f’oth ko binaw, ni kan f’oth nga daken e tabnaw rorad, 15u ba’ ni ngek e Jordan, u puluwon yu Jeriko nga barba’.”

Pi Tayugang’ nra ted e F’oth ko Binaw

16Me ga’ar SOMOL ngak Moses, 17“Eleazar ni prist nge Joshua nib mo’on ni fak Nun, e ngar f’othew e binaw ko girdi’. 18Ra reb e ganong ma ngan fek reb e tayugang’ riy nge ayweg e gali cha’ney i ki’eg e binaw.” 19-28Ba’aray e pi pumo’on ni SOMOL e mel’egrad:

Ganong Mitethin
Judah Kaleb nib mo’on ni fak Jefunneh
Simeon Shelumiel nib mo’on ni fak Ammihud
Benjamin Elidad nib mo’on ni fak Kislon
Dan Bukki nib mo’on ni fak Jogli
Manasseh Hanniel nib mo’on ni fak Efod
Efraim Kamuel nib mo’on ni fak Shiftan
Zebulun Elizafan nib mo’on ni fak Parnak
Issakar Paltiel nib mo’on ni fak Azzan
Asher Ahihud nib mo’on ni fak Shelomi
Naftali Pedahel nib mo’on ni fak Ammihud

29Irera’ e pi pumo’on ni duwgiliy SOMOL ni ngar ki’egged e binaw nu Kanaan ngar pi’ed i tafenay e girdi’ nu Israel.

Bible Ni Thothup

© 2007 Bible Society of Micronesia. Released under the Creative Commons CC-BY-SA license 4.0.

More Info | Version Index